The Bike é unha forma de actuar, de se mover, de xirar, de ascender e de descender. Unha forma de transportar a nosa sistemática forma de ser mediante a fusión coa súa estrutura a través dunha absoluta abstracción de todo aquilo apartado do camiño que percorremos nese momento. O simple feito de montar na bicicleta supón a aceptación dunha forza secundaria capaz de axudarnos a percorrer (por fóra ou por dentro) os sendeiros que a rutina perfila con trazo groso sobre a superficie da vida. O simple feito de impulsar os seus pedais implica a asunción da súa indispensabilidade á hora de enfiar calquera iniciativa individual. Por iso sempre se atopa dispoñíbel. Sempre. Nos lugares e momentos oportunos, sen fallar, precisa coma un mecanismo de reloxo. Alí onde se inicia una rutina, a bicicleta resulta necesaria. E, entón, ela aparece. Para todos e para ninguén á vez. Formando parte da nosa vida. Da nosa rutina. E tamén do noso xeito máis ou menos colorista de enfrontarnos a ela.